Украинадагы согуштун бешинчи күнү. Өткөн түндөгү окуялар тизмеги (фото)

Орусиянын Украинага кол салганына бүгүн 5 күн болду. Куралдуу кол салуулар уланып, Украинанын экинчи эң ири шаары Харьковдо карапайым калкка да ок атыла баштады.

Өткөн түндөгү окуялар тизмеги:

Япония Путин, Медведев, Лавров жана Шойгуга каршы санкцияларды киргизди.
Украина Евробиримдикке мүчө болуп кирүү үчүн арыз жазды. Тарыхый документке президент Зеленский кол койду.
БУУнун эсеби боюнча Украинадан качкандардын саны 500 миңге чукулдады.
Walt Disney компаниясы фильмдерин Орусиянын кинотеатрларында көрсөтүүнү токтотту. Warner Bros. премьерага бир күн калганда «Бэтмен» презентациясын токтотту. Netflix Орусиянын телеканалдарын трансляциялоодон баш тартты.
Harley-Davidson, Volvo, General Motors компаниялары өнүмдөрүн Орусияга жеткирип берүүсүн токтотту.
Mastercard Орусиянын бир катар банктарын өз системасынан чыгарды.
Канада дүйнөдө биринчи болуп Орусиядан мунай импорттоодон баш тартты.
28-февраль күнү Орусияда согушка каршы чыккан митингчилерди кармоо уланып, 400дөй жаран камакка алынды.