Депутат абактагы журналисттерди бошотууну өтүндү

Депутат Жанар Акаев милициянын убактылуу кармоочу жайындагы журналисттерди үй камагына чыгарууну өтүндү. Жогорку Кеңештин 17-апрелдеги жыйынында Акаев 11 журналист кармалып, жетөө бошотулганын, төртөө дагы эле камакта экенин эске салды.

«Аларды үй камагына чыгарып, тергөө амалдарын улантса болот. Журналисттердин камакта жатканы Кыргызстандын кадыр-баркына да абийир алып келбейт. Буга өзгөчө көңүл бурууну суранам» , — деди Акаев.

Быйыл 16-январда “Темиров Live”, “Айт айт десе”, “ПолитКлиника” жана “Арча Медиа” басылмаларынын журналисттеринин үйлөрүнө тинтүү жүргүзүлдү. Алар:

• Махабат Тажибек кызы (Temirov Live).
• Сапар Акунбеков («Айт айт десе»).
• Азамат Ишенбеков (акын «Айт айт десе»).
• Сайпидин Султаналиев («Арча Медиа»).
• Актилек Капаров («Алга Медиа»).
• Тыныстан Асыпбеков («ПолитКлиника»).
• Максат Тажибек уулу (Temirov Live).
• Жоодар Бузумов.
• Жумабек Турдалиев.
• Айке Бейшекеева.
• Акыл Орозбеков.

Аларга Кылмыш-жаза кодексинин 278-беренесинин 3-бөлүгү (мамлекеттик кызматкерлердин мыйзамдуу талаптарына активдүү баш ийбөөгө жана массалык баш аламандыкка, ошондой эле жарандарга зомбулук көрсөтүүгө чакырыктар) менен айып тагылган.

17-январда Бишкектин Биринчи Май райондук соту журналисттердин баш коргоо чарасын карап, эки айга камакка алган.

Учурда жети журналист үй камагына чыгарылды, төртөө тергөө абагында:

Махабат Тажибек кызы, Айке Бешекеева. Азамат Ишенбеков, Актилек Капаров.