Кызамык менен ооругандар 6,5 миңден ашты

Кыргызстанда жыл башынан бери кызамык менен ооругандардын саны 6545ке жетти. Бул тууралуу Республикалык иммунопрофилактика борборунан билдиришти.

Вирус эң көп Бишкек шаары, Чүй жана Жалал-Абад облустарында катталууда.

Март айынын 20сында кызамыктын 6081 учуру катталганын Республикалык иммунопрофилактика борборунун директору Гүлбара Ишенапысова брифингде билдирген.

Кызамык боюнча эпидемия 2023-жылы болгон, анда 7 миң 46 учур катталган.

Оорунун көбөйүшүнүн негизги себеби — балдар жана чоңдор арасында кызамыкка каршы пландуу эмдөөдөн баш тартуу болууда.

Саламаттыкты сактоо министрлиги кызамык менен күрөшүү боюнча профилактикалык жана эпидемияга каршы иш-чараларды күчөттү. Кыргызстанда илдеттин чыгышына каршы эмдөө кампаниясынын экинчи этабы башталды, ал Жалал-Абад облусунда өтөт.