Пашинян Азербайжан менен компромисске барууну көздөйт

Ереван Баку менен компромисске барбаса, 1990-жылдардын башынан бери кармап турган Азербайжандын төрт кыштагын кайтарып бербесе, өлкөсү согушка дуушар болушу мүмкүн. Бул тууралуу Армениянын өкмөт башчысы Никол Пашинян 18-мартта Тавуш чөлкөмүндөгү чек ара аймактарынын жашоочулары менен жолугушууда айтты.

Отуз жылдан бери адам жашабаган төрт айыл Армения үчүн стратегиялык мааниге ээ, анткени алар Ереван менен Грузиянын чек арасын бириктирген негизги жолду басып өтөт.

Азербайжан Армениянын аймагы менен курчалган чакан анклавдарын кайтарып алуу Тоолуу Карабак чөлкөмүндөгү отуз жылдан бери уланып келе жаткан жаңжалды токтотуу үчүн тынчтык келишиминин зарыл шарты экенин билдирди.

Орусиянын ТАСС мамлекеттик маалымат агенттиги Пашиняндын өкмөтү тараткан видеодо тургундарга талаштуу айылдар боюнча компромисске барбоо «апта аягына чейин» Азербайжан менен согушка алып келиши мүмкүн экенин жазды.

«Мындай согуш кандай аяктаарын билем», — деди Пашинян.

Өткөн жылдын сентябрь айында Бакунун аскерлери Тоолуу Карабакты кайра басып алгандан кийин Ереван чоң жеңилүүгө учурап, ал аймактагы 100 миңдей этникалык армян Арменияга качкан.

Карабак эл аралык деңгээлде Азербайжандын аймагы катары таанылганы менен, чөлкөмдөгү этникалык армяндар 1990-жылдардын башындагы согуштан бери Бакудан иш жүзүндө көз карандысыз болуп келген.