Үркүндү эскерүү жумалыгына байланыштуу бир катар иш-чаралар өтөт

Үркүндү эскерүү жөө жүрүшүнөн көрүнүш. 2022-жыл

1916-жылдагы Үркүн каргашасын эскерүү жумалыгына байланыштуу өлкө аймагында бир катар иш-чаралар өтөт.

«Эсимде» изилдөө аянтчасы 9-август күнү саат 18:00дө «Үркүндү эскерүү тажрыйбалары» талкуусун өткөрөт. Анда «Үркүн бүтсүн» тасмасы көрсөтүлөт жана 1991-2023-жылдардагы 1916-жылдагы трагедиялуу окуяларды эскерүү жүрүштөрү тууралуу сөз болот.

Ошондой эле, филология илиминин кандидаты Гүлзада Станалиева “Үркүн темасы адабиятта” аттуу ачык лекция окуйт. Иш-чара Жукеев-Пудовкин 44/1 дарегинде «Эсимде» кеңсесинде өтөт. Башталышы 18:00.

Ал эми 10-12-август күндөрү Ысык-Көлдүн Тосор айылында эскерүү жүрүшү өтөт. Анда жөө жүрүшкө катышуучуларды тосуп алуу 10-августта болот. 11-августтан Тосор айылынан эки топко бөлүнүп, 1916-жылы эл Кытай тарапка качкан жол аркылуу жөө жүрүш башталат. Кыргын-Сайдан башталган жүрүш Дуулат-Булакка чейин созулат.

Мындай эскерүү жөө-жүрүшү бир канча жылдан бери өткөрүлүп келет. Иш-чараны «Тосор» коому уюштурат.

Августтун биринчи жумасы Үркүндү эскерүү жумалыгы. 1916-жылдагы трагедиянын эң оор күндөрү дал ушул күндөргө туура келген.