Садыр Жапаров кыргызстандыктарды Курман айт майрамы менен куттуктады

Президент Садыр Жапаров бүгүн, 9-июлда кыргызстандыктарды Курман айт майрамы менен куттуктады. Анда биримдик, боорукерлик жана кайрымдуулук адамзаттын баа жеткис рухий байлыктарынан болсо, Курман айт – дал ушундай баалуулуктарды даңазалаган мусулмандардын башкы майрамдарынын бири деп айтылат.

«Ата-бабалар да илгертен бери Жаратканга жакындоо максатында Курман айтта мал союп, курмандык чалып, куран окуп, жакшы бата-тилектерин айтышкан. Колунда барлар курмандыкка чалган малдын этин муктаждарга таратып, эл арасындагы бир туугандык сезимдерди арттырып, бири-бирине болгон сый-урматты күчөтөт. Мындай иш-аракеттердин аркасында барга топук, азга каниет кылып, мээримдүүлүк менен кайрымдуулукка үндөп келишкен. Курман айт коомчулукта тең салмактуулукту жаратып, боордоштук, бир туугандык сезимдерди өркүндөтүп-өрчүтөт» , -деп айтылат куттуктоодо.

Жапаров союлган курмандыктар менен аткарыган ажылык парздар да кабыл болуусун тиледи.

Бүгүн Жапаров Бишкек шаарындагы Т. Усубалиев атындагы аянтта Курман айтка байланыштуу майрамдык айт намазга катышты.