Бишкекте мас айдоочу унаасы менен сүзгөн кыз көз жумду (видео)

Бишкек шаарынын борборунда Киев-Исанов көчөлөрүнүн кесилишинде мас абалында Subaru Forester айдоочусу сүзүп кеткен кыз реанимацияда каза болду. Бул тууралуу Жол кыймылынын коопсуздугун камсыздоо башкы башкармалыгынын басма сөз кызматы билдирди.

Маалыматка ылайык, айдоочу өзү жасаган жол кырсыгы болгон жерден из жашырып, жол чырактын кызыл күйүп турган жеринен өтүп, ошол учурда жолдон өтүп бара жаткан кызды сүзүп алган.

Белгилей кетсек, бүгүн, 7-апрелде болжол менен саат 08:45 чамасында оң рульдуу Subaru Forester унаасы Бишкек шаарынын Чүй менен Исанов көчөлөрүнүн кесилишинен «Опель-Астра» унаасын сүзүп чоң материалдык чыгым келтирген.

Айдоочу жоопкерчиликтен качуу максатында окуя болгон жерден качып бара жатып, Исанов менен Киев көчөлөрүнүн кесилишинен жөө өтмөктөн 25-30 жаштагы кыз кишини сүзүп, андан ары Бөкөнбаев менен Логвиненко көчөлөрүнүн кесилишинен жолдун жээгиндеги электр мамысын сүзүп токтогон.

Жөө жүргүнчү оор абалда ооруканага жеткирилип, айдоочусун текшерүү учурунда Бишкек шаарынын 27 жаштагы В.Т. аттуу тургуну экени жана алкоголдук ичимдик ичип алгандыгы аныкталган.

Унаа айып аянтчага токтотулуп, тийиштүү экспертизалар дайындалган.