Украинадагы согуштун 12-күнү: маанилүү окуялар тизмеги (фото)

Украинадагы согуштун башталганына бүгүн туура 12 күн болду. БУУнун берген маалыматы боюнча Орусиянын бомбалоосунан 350 украиналык жай тургун каза тапкан. Анын ичинен 38и жаш балдар. Ошондой эле согуштун айынан жер которууга мажбур болгон украиналыктардын саны 1,5 миллиондон ашты. Ал ортодо Орусиянын президенти Владимир Путин согуш кайсы учурда токтору тууралуу «Киев бийлиги качан аскердик операцияларын токтотсо, биз да токтобуз», -деп билдирди.

12-күнгө алынган окуялардын маанилүү тизмеги:

• Качкындардын саны 1,5 миллиондон ашты.
• Орусия президенти Владимир Путин жекшемби күнү кечинде Түркиянын президенти Эрдоган менен телефондо сүйлөштү. Расмий Анкара эки тарапты тең согуштук аракеттерди токтотууга чакырды.
• Орусиялык «Аэрофлот», «AzurAir», «Nordwind», «PegasFly» авиакомпаниялары 7-марттан тарта эл аралык каттамдарын убактылуу токтотту.
• Орусия Украинада 2200 аскердик объектти жок кылганын билдирди.
• Украина тарап Орусиянын аскерлеринин жоготуулары 11 миңге жетти деп жарыялады.
• Орус-украин сүйлөшүүлөрүнүн 3-раунду Польша менен Белоруссиянын чек арасында өтүүсү күтүлүүдө
• Netflix Орусиядагы ишмердүүлүгүн токтотту.
• Орусия тарап учурда ээлеп алган Херсон облусуна гуманитардык жүк жеткирди.
• Украина президенти Харьков, Чернигов, Мариуполь, Херсон, Гостомель, Волноваха шаарларына «Баатыр шаар» наамын ыйгарды.
• Улуу Британия Украинага 100 млн доллар жардам көрсөтөт.
• Сирияда Орусиянын аскердик аракеттерин колдогон марафон болуп өттү.
• АКШнын президенти Байден Украинага аскердик жана экономикалык колдоо көрсөтүү үчүн 10 млрд доллар жардам бөлүү сунушун Конгресске жиберди.