Кыргызстан Түркмөнстандан электр энергиясын кайрадан ала баштады

Кыргызстан Түркмөнстандан электр энергиясын кайрадан ала баштады. Бул тууралуу Энергетика министрлиги кабарлады.

Буга чейин  Түркмөнстандагы табият кырсыгынан улам линияда авария болуп, Кыргызстанга электр энергиясынын берүү убактылуу токтотулган.

17-ноябрдан тарта Түркмөнстан Кыргызстанга электр энергиясын кайрадан экспорттойт.

Электр энергиясы буга чейин эки өлкөнүн ортосунда түзүлгөн келишимдин негизинде алынууда.

«Электр энергиясын импорт кылып жатканыбыздын максаты: кышкысын калкты жарык менен үзгүлтүксүз камсыз кылуу жана Токтогул суу сактагычындагы суунун көлөмүн үнөмдөө«, — деп айтылат маалыматта.

Быйыл былтыркыга салыштырмалуу Токтогул суу сактагычындагы суунун көлөмү дээрлик 3 млрд куб метрге аз. Ага карабастан адистер авариялык кырдаалдан башка учурларда өчүрүүлөр болбой турганын айтышат.