УКМК: «Эмгек» партиясынын өкүлү кармалды

Бишкек шаардык кеңешине шайлоого катышып жаткан «Эмгек» партиясы тарабынан добуш сатып алуу фактысы аныкталды. Бул тууралуу Улуттук коопсуздук мамлекеттик комитетинен кабарлашты.

10-июлда УКМК ыкчам-издөө иш-чараларын жүргүзүү учурунда Бишкек шаарынын Ленин районунун муниципалдык аймактык башкармалык (МТУ-2) жашоочуларына акча таратып жаткан жеринен «Эмгек» партиясынын өкүлү K.E.A. кармалды.

Бул факты Кылмыш-жаза кодексинин 192-беренеси (добуш сатып алуу) боюнча кылмыштардын жана жоруктардын бирдиктүү реестрине катталды.

Иликтөө иштеринин жүрүшүндө кармалган К.Э.А. «Эмгек» партиясынан талапкер «Р.у.Т.» көрсөтмөсү боюнча МТУ-2 жашоочуларынын ар бир катталган шайлоочуга 1000 сомдон таратып жаткан.

Кармалган жаранды тинтүү учурунда жанында 10 миң сом жана акча алгандыгы жөнүндө белги коюлган шайлоочулардын тизмеси табылган.

Учурда УКМК тарабынан тиешелүү ыкчам-тергөө иш-чаралар улантылууда.

Бүгүн, 11-июлда Бишкек, Ош, Токмок шаардык кеңештеринде кайра шайлоо өтүүдө.