Президент УКМКга 2010-жылдагы Ош коогалаңын иликтөө тапшырмасын берди

Президент Садыр Жапаров Улуттук коопсуздук боюнча мамлекеттик комитетке 2010-жылдагы Ош коогалаңын иликтөө тапшырмасын берди. Бул тууралуу Президенттин аппаратынын маалымат кызматы билдирди.

Маалым болгондой, өлкө башчысы УКМКга жүргүзүлгөн иштин жыйынтыгы боюнча мамлекеттик органдар тарабынан кабыл алынган чечимдер жөнүндө толук маалымат берүүнү, ошондой эле мыйзамдуулукту жана объективдүүлүктү сактоо менен тиешелүү чечимдерди кабыл алууну тапшырган.

2010-жылдын 10-июнь күнү кечинде Ош шаарынын борбордук бөлүгүндөгү казинолордун биринде кыргыз-өзбек жаштарынын ортосунда чыр чыгып, ал улуттар аралык араздашууга алып келген. Бул бара-бара өлкөнүн түштүк аймагына жайылып, аймак алты күндөн ашык тынчыбай турган. Окуядан жүздөгөн адам каза таап, миңдеген адам жаракат алган. Нечендеген адам үй-жайсыз калган. Бул иш боюнча кылмыш иши козголуп, бир нече шектүү камакка алынып, бир канчасына сыртынан өкүм чыккан. Анткен менен иш ушул кезге дейре толук аягына чыкпай келет.