Кыргызстан-Орусия эриш-аркак жылынын жабылыш аземи күздө өтөт

Кыргызстандын Орусиядагы элчиси Гүлнара-Клара Самат Орусия Президентинин Эл аралык маданий кызматташуу боюнча атайын өкүлү Михаил Швыдкой менен жолугушту. Бул тууралуу элчиликтин басма сөз кызматы билдирди.

Маалыматка ылайык, тараптар Кыргызстан-Орусия эриш-аркак кызматташтык жылынын алкагында кабыл алынган 200гө жакын келишимди жүзөгө ашырууну талкуулашты.

Ошондой эле Орусиянын алдыңкы жамааттарынын республиканын аймактарына концерттик турларын уюштуруу маселеси каралды.

Эки өлкөнүн эриш-аркак кызматташтык жылынын жабылыш аземи ушул жылдын күз айларына мерчемделген.

Элчи Гүлнара-Клара Самат эриш-аркак кызматташтык жылды жыйынтыктаган концерттик программага көрүнүктүү советтик композитор Дмитрий Шостаковичтин «Кыргыз жана орус темаларындагы увертюралар» чыгармасын киргизүүнү суранды.