Өкмөттүн 100 күндүк иш планы бекитилди

Премьер-министр Улукбек Марипов Өкмөттүн коомдук жана экономикалык туруктуулукту камсыздоо боюнча аткарыла турган иш-чараларынын планын бекитти. Тиешелүү буйрукка Улукбек Марипов кол койгонун Өкмөттүн маалымат кызматы билдирди.

Иш план Президенттин жарлыктарын жана Өкмөт башчы тарабынан коюлган милдеттерди аткарууга багытталып, ишке ашыруу мөөнөтү ушул жылдын 1-июнуна чейин деп белгиленди.

План боюнча биринчи кезекте төмөнкү багыттарды жөнгө салуу каралды:

-Калк үчүн ыңгайлуу шарттарды түзүү, мында негизги басым электрондук тейлөөнүн санын жана сапатын жогорулатууга жасалат;

-Бизнес үчүн жагымдуу шарттарды түзүү;

-Коомдогу актуалдуу маселелер жана токтоосуз чечимдерди талап кылган чараларды, айылдардагы ичүүчү суу менен камсыздоо тутумун куруу жана калыбына келтирүү жаатындагы инфратүзүмдүк долбоорлорду ишке ашыруу;

— Калкты коронавируска каршы эмдөө, республиканын мектептеринде жана мектепке чейинки мекемелеринде инфекцияга жол бербөө жана анын жайылышынын алдын алуу боюнча профилактикалык чараларды күчтөндүрүү, дары-дармек каражаттарын жана медициналык буюмдарды чыгарууга убактылуу тыюу салуу боюнча маселелерди чечүү, айыл чарба товарларынын, тамак-аш азыктарынын тийиштүү корун камсыздоо жана аларга карата бааны туруктуу кармоо аракетин көрүү.

Пландын сапаттуу жана өз убагында аткарылышы үчүн тиешелүү тараптардын милдети так аныкталган. Аткарылбай калган учурда жоопкерчиликке тартуу каралган.