Президент кайрылуу жасады (видео)

Президент Сооронбай Жээнбеков кайрылуу жасап, бардык күчтөрдү укуктук талаага кайтууга чакырды.

Төмөндө мамлекет башчынын кайрылуусу:

«Урматтуу мекендештерим!

Кечээ түнү айрым саясий күчтөр мамлекеттик бийликти мыйзамсыз тартып алуу аракетин жасашты.

Шайлоону шылтоо кылып, коомдук тартипти одоно бузушту.

Шаар тургундарынын тынч жашоосуна бүлүк салышты.

Тартип сакчыларына баш ийбей, медиктерди сабап, имараттарды талкалашты.

Кан төгүлбөсүн, бир да жарандын өмүрүнө коркунуч келбесин деп, күч органдарына ок чыгарбоого буйрук бердим.

Азыркы учурга чейин кырдаалды курчутпоо үчүн мүмкүн болгон чаралардын баарын жасадык.

Мамлекеттин тынчтыгы, коомдун стабилдүүлүгү — ар кандай депутаттык мандаттан бийик.

Мен Борбордук шайлоо комиссиясына мыйзам бузууларды терең изилдеп, зарыл болсо шайлоонун жыйынтыгын жокко чыгарууну сунуш кылдым.

Саясий партиялардын лидерлерине өз тарапкерлерин тынчытып, чогулган жерлерден чыгарып кетүүсүн сунуштайм.

Бардык мекендештеримден тынчтыкты сактап, чагымчыл күчтөргө алданбай, мыйзамсыз кадамдарга барбоону суранам.

Өлкөбүздүн тынчтыгы, коомубуздун коопсуздугу — баарынан кымбат.

Бардык күчтөрдү өлкөнүн тагдырын саясий амбициялардан бийик коюп, укуктук талаага кайтууга чакырам».

"Марал радиосу" Телеграмда

"Марал радиосу" Инстаграмда

Жарнама

Бахар Хакимова

Тектеш материалдар

4 пикир

Марал Радиосу