Үсөнбаев: Кыргызстанга коронавирус жуктуруп келгендердин баары аныкталды

Кыргызстанга коронавирус илдетин алып (жуктуруп) келгендердин баары аныкталды. Бул тууралуу бүгүн, 9-майда өткөн брифингде Саламаттыкты сактоо министринин орун басары Нурболот Үсөнбаев билдирди.

Анын айтымында, алар менен контактта болгондор да толук аныкталган.

— Учурда изилдөө иштери улантылып жатат. 30 миңден ашык жаран обсервация жана үй карантининен өткөрүлдү. Илдетке чалдыккандардын дээрлик 72 пайызы сакайып чыкты, — деди Нурболот Үсөнбаев.

Кыргызстанда коронавирус илдети катталган алгачкы учур 18-мартта аныкталган. 9-майга карата ооруну жугузуп алгандардын жалпы саны 931ге жетти. 12 жаран бул илдеттен каза болду. Арасында бир дарыгер айым каза болду.

Соңку маалыматтарга ылайык дүйнө жүзүндө коронавируска кабылгандар 4 миллиондон ашты. Андан каза болгондордун саны 276480ди чапчыды. 1 млн 395 миң адам оорудан сакайып кеткен.