Кочкоров: Эми жардамга муктаждар билдирүүлөрүн электрондук түрдө жибере алат

Гуманитардык жардамга муктаждар 1227.tunduk.kg сайты аркылуу билдирүү калтырса болот. Бул тууралуу өкмөт үйүндөгү маалымат жыйында эмгек жана социалдык өнүктүрүү министри Улукбек Кочкоров билдирди.

Анын айтымында, «1227» номерине кайрылгандарга жооп берүүгө жетишпей жатышкандыктан, электрондук түрдө билдирүү калтыруу үчүн 1227.tunduk.kg сайты ишке киргизилген.

−Маалыматтык технологиялар жана байланыш мамлекеттик комитети тарабынан 1227.tunduk.kg сайты иштелип чыкты. Ар бир жаран аталган сайтка кирип билдирүүлөрдү калтырса болот. Бүгүнкү күндөн тарта ишке кирип жаткан сайтка мобилдик телефондордон да билдирүүлөрдү калтырса болот, — дейт ал.

Кочкоров белгилегендей, штаб түзүлгөндөн бери 210 миң 779 кайрылуу келип түшкөн.

−Колунда бар адамдар да жардам сурап жаткан учурлар катталууда, — деп кошумчалады министр.