Салыктык жалпы декларациялоо 2026-жылга чейин жылдырылды

Мыйзам Жогорку Кеңеште 22-январда кабыл алынган.

Аталган Мыйзам менен салыктык жалпы декларациялоо 2026-жылга чейин жылдырылды жана жеке жактардын айрым категориялары үчүн бирдиктүү салык декларацияны тапшыруунун милдеттүүлүгүн этап боюнча киргизүү каралды.

Кабыл алынган мыйзамга ылайык бирдиктүү салык декларациясын берүү боюнча Салык кодексинин 92-беренесинин талаптары:

1) 2021-жылдан тартып башталган мезгил үчүн төмөнкүлөргө жайылтылат:

— илимий-изилдөө, чыгармачылык, окутуучулук, дарылоо-ден соолукту чыңдоо жана калкты тейлөө боюнча аткаруучу-тескөөчү иш-милдеттер менен байланышпаган мамлекеттик органдардын жана жергиликтүү өз алдынча башкаруу органдарынын карамагында болгон органдарда, ишканаларда жана уюмдарда иштеген жеке жактарга;

— мамлекеттик органдарда, мамлекеттик жана муниципалдык ишканалар менен мекемелерде, ошондой эле мамлекеттик үлүштүк катышы бар уюмдарда иштеген жеке жактарга;

— эл аралык уюмдардагы иштен киреше алган, бирок Кыргыз Республикасында жашап турууга укугу же кайрылман статусу бар жеке жактарга;

— салыктык мезгилде эсептик көрсөткүчтүн 3 миң эселенген өлчөмүнөн жогору суммада менчик укугун же мүлккө болгон башка укугун сатып алууга багытталган бир жолку чыгымдарды тарткан жеке жактарга.

2) 2023-жылдан тартып башталган мезгил үчүн салыктык мезгилде салык салынуучу кирешелерди алган жеке жактарга жайылтылат.

3) 2025-жылдан берки мезгилдеги бирдиктүү салык декларациясын тапшыруу Салык кодексинин 92-бересинде көрсөтүлгөн адамдардын бардык категорияларына таркатылат.

Мыйзамга ылайык 2021-жылдан, 2023-жылдан же 2025-жылдан тартып башталган мезгил үчүн бирдиктүү салык декларациясын берүүгө милдеттүү субъекттер бирдиктүү салык декларациясын көрсөтүлгөн мезгилдер башталганга чейин ыктыярдуу негизде берүүгө укуктуу.

Мыйзам ушул жылдын 1-январынан тартып күчүнө кирди.