УКМК: ЖК депутатынын атасы кылмыштуу жолдон баш тартты (видео)

Улуттук коопсуздук мамлекеттик комитети уюшкан кылмыштуу топтор менен күрөшүү активдүү жүрүп жатканын кабарлап, криминалдык жолдон баш тарткандар тууралуу маалымат берди.

Билдирүүдө айтылгандай, Ноокат районунун Герей-Шерон айылынын 1980-жылы туулган тургуну, Кызыл-Кыя шаарындагы криминалдык топтун башчысы делип жүргөн Малабаев Гүлжигит Карабаевич кылмыштуу топтон баш тарткан.

Ал 2019-жылдан бери «Женго» каймана аты бар Кадыр Досонов уюштурган кылмыштуу топтун мүчөсү катары Кызыл-Кыя шаардык ички иштер башкармалыгында каттодо турган. Ушул жылдын 23-сентябрында курал-жарак, ок-дарыны, баңгизаттарды мыйзамсыз сактоо боюнча козголгон кылмыш иштин алкагында кармалган. Учурда Ош шаарындагы №25 тергөө абагында сурак берип жатканы айтылды.

Аны менен катар Жогорку Кеңештин депутаты Чынгыз Ажибаевдин атасы кылмышкерлер чөйрөсүнө «Дед Хасан, прокурор» ысымдары менен таанымал, Раззаков шаарынын 1964-жылы туулган тургуну Ажибаев Ильяскожо Рахманбердиевичти да кылмыштуу топтон баш тарттыруу иштери жүргөнү айтылды.

УКМК берген тизмеде булардан тышкары төмөнкүлөрдүн да аттары аталган:

• Абдырахманов Равшанбек Орозбаевич (Равшан тентек) — Баткен шаарынын 1967-жылы туулган тургуну, улуту кыргыз. 2013-жылдан бери Кадыр Досонов уюштурган кылмыштуу топтун мүчөсү катары Баткен облустук ички иштер башкармалыгында каттоодо турат.
• Рахманкулов Асланбек Маматбекович (Голова) — Кызыл-Кыя шаарынын 1973-жылы туулган тургуну, улуту кыргыз. 2015-жылдан бери Кадыр Досонов уюштурган кылмыштуу топтун мүчөсү катары Ички иштер министрлигинин каттоосунда турат.
• Саидбаев Ильяз Мамединович (Илюха) — Кызыл-Кыя шаарынын 1983-жылы туулган тургуну, улуту кыргыз. 2010-жылдан бери Кадыр Досонов уюштурган кылмыштуу топтун мүчөсү катары Кызыл-Кыя шаардык ички иштер бөлүмүнүн ыкчам каттоосунда турат.

Айта кетсек, УКМКнын төрагасы Камчыбек Ташиев 23-ноябрда Жогорку Кеңеште өткөн жыйында кылмыштуу топторго каршы аёсуз күрөш жүрүп жатканын айтып, мындан ары «Матраимов, Көлбаев, Женго» деген болбосуна убада берген.