Султанбаев: Mega компаниясы мамлекеттин карамагында калат

Президенттин басма сөз катчысы Эрбол Султанбаев «Альфа Телеком» (Mega) компаниясынын сатылышы боюнча билдирүү жазды.

Ал аталган компания сатылса да мамлекеттин пландары өзгөрбөгөнүн, компания мамлекеттин карамагында калып, өлкөнүн экономикасына салым кошууну улантарын айтты.

«Учурда компанияга жарыяланган аукционго Мамлекеттик өнүктүрүү банкы катышып, уюлдук операторду сатып алууну пландоодо. Мындан тышкары, башкаруучунун алмашуусу калк үчүн кызмат көрсөтүүлөрдүн сапатын жакшыртууга алып келери күтүлүүдө» , — деди Султанбаев.

«Альфа-Телеком» (MEGA соода маркасы) компаниясынын 100 пайыз толук пакети аукционго коюлганын 4-июлда Мамлекеттик мүлктү башкаруу фондунан кабарлашты.

Маалыматта айтылгандай, компаниянын 8,7 миллион даана акциясы мамлекетке таандык. Ал 2G, 3G жана 4G стандарттарында уюлдук мобилдик радиотелефон байланышын жана маалыматтарды берүү кызматтарын көрсөтөт, ошондой эле телекоммуникациялык тармактарды, системаларды жана түзүлүштөрдү долбоорлоо, куруу, монтаждоо жана фискалдык маалыматтар оператору боюнча кызматтарды көрсөтөт.

«Альфа-Телеком» ЖАКтын мамлекеттик пакетинин акциясынын баштапкы суммасы — 14 миллиард 600 миллион сом.

Аукцион 2-октябрда өтөт. Ага катышуу үчүн арыздар бүгүнтөн баштап 2-октябрь саат 10:00гө чейин кабыл алынат.

Аукционго катышуу үчүн электрондук соода аянтчасынын порталында катталып, арыз толтуруп, керектүү документтерди тиркөө жана көрсөтүлгөн объекттин баштапкы баасынын 10 пайызы (1 млрд 460 млн сом) өлчөмүндө кепилдик төлөмдү төлөө керек.