Быйыл тамак-аштан уулануу боюнча 51 учур катталып, 185 жаран жабыркаган

Кыргызстанда жыл башынан бери тамак-аштан уулануу боюнча 51 учур катталып, 185 жаран жабыркаган.

Бул тууралуу 3-июнда өткөн маалымат жыйында Саламаттыкты сактоо жана коопсуздук департаментинин тамак-аш азыктарынын коопсуздугун көзөмөлдөө жана алиментардык оорулардын алдын алуу башкармалыгынын башчысы Азамат Имакеев билдирди.

Анын ичинен массалык уулануу боюнча 5 учур катталып, алардан 117 адам жабыркаган.

Ысык-Көл облусунда апрель айында «Алиппе» майрамы күнүнө арналган иш-чарада мектеп окуучуларынын арасында биринчи массалык уулануу катталган. Учурда окуучулардын абалы жакшы экени айтылды.

1-майда Ош облусунда (56 адам жабыркаган), 5-майда Бишкек шаарында (11 адам жабыркаган), 10-майда Сүлүктү шаарында (34 адам) катталган.

Имакеевдин айтымында, текшерүүнүн жүрүшүндө продукциянын сактоо мөөнөтү, сактоо шарттары боюнча көптөгөн мыйзам бузуулар аныкталды. Бузуулар жөнүндө кодексине ылайык протоколдор түзүлүп, материалдар ИИМге өткөрүлүп берилди.