Депутат Бактыбек Турусбеков Ысык-Көлдү үчүнчү ирет сүзүп өттү

Жогорку Кеңештин депутаты Бактыбек Турусбеков Ысык-Көлдү үчүнчү ирет сүзүп өттү.

Жекшемби күнү, 8-августта көлдүн бир жээгинен экинчи жээгине сүзүп өтүү боюнча жарыш өткөн. Ага катышкандар көлдүн тескейиндеги Тоң районунун Кара-Талаа айылынан күңгөйдөгү Ысык-Көл районунун Тору-Айгыр айылына чейин сүзүп келишкен.

Nomadsport компаниясы уюштурган жарышта депутат Бактыбек Турусбеков 14 чакырым аралыкты 5 саат 27 мүнөттө сүзүп өтүп, марага биринчи жеткен.

«Жашы 57ге келип калганына карабастан, ал өзүнүн жаш атаандаштарын жеңип алды. Мындай натыйжага жетишүүгө анын жаш кездеги тажрыйбасы жардам берди», — дейт уюштуруучулар.

Турусбеков Ысык-Көлдү алгачкы ирет 2018-жылы, андан кийин 2019-жылы сүзүп өткөн.