Президент Жапаров Апас Жумагулов менен жолугушту

Президент Садыр Жапаров 19-сентябрда Кыргыз Республикасынын Баатыры Апас Жумагулов жана анын жубайы менен “Ынтымак Ордо” имаратында жолугушту.

Мамлекет башчы Апас Жумагулов Кыргызстандын өкмөтүн жетектеп турганда, өлкө татаал кырдаалга туш болгондо, саясий жана экономикалык кризистен чыгуунун жолун тапканын белгиледи. Апас Жумагуловдун жетекчилиги астында өлкө туруктуу өнүгүү жолуна түшкөнүн айтты.

Президент Апас Жумагулов сыяктуу көрүнүктүү инсандардын жана мамлекеттик ишмерлердин портреттери мамлекеттик мекемелердин дубалдарында илинип турушу керектигин белгиледи.

Буга байланыштуу 2024-жылы Апас Жумагуловдун 90 жылдыгын белгилөө максатында президенттин фондунан Жумагуловдун параддык портретин “Ынтымак Ордо” имаратынын коридоруна орнотуу үчүн каражат бөлүнөрүн айтты.

Апас Жумагулов мамлекет башчыга көңүл бургандыгы үчүн ыраазычылык айтып, мындан ары да өлкөнүн өнүгүшүн чыңдоого активдүү көмөктөшүүгө даяр экендигин билдирди.