Чүйдө дарыгерге кол көтөргөн жаран кармалды

Чүй облустук ички иштер башкармалыгы социалдык тармакта дарыгерге кол көтөргөн видео тууралуу маалымат берди. Анда жарандын өздүгү такталып, кармалганы айтылат.

Мекеменин маалыматында, 19-августта Чүй райондук ички иштер бөлүмүнө Томок шаарынын 1997-жылы туулган З.И. аттуу жаран арыз менен кайрылган. Анда ошол эле күнү Чүй райондук ооруканасынын жандандыруу бөлүмүндө таңкы саат 04:00 чамасында ага И.Ж. аттуу жаран себепсиз кол көтөрүп, денесине зыян келтиргенин айтып, чара көрүп берүүнү өтүнгөн.

Бул факт Чүй райондук ИИБде катталып, Кылмыш-жаза кодексинин 280-беренеси (бейбаштык) боюнча кылмыш иши козголгон.

Тергөөнүн жүрүшүндө аныкталгандай, 19-августка караган түн саат 01:00 чамасында Чүй райондук ооруканасынын жандандыруу бөлүмүнө 2003-жылы туулган И.Ж. аттуу жаран «алкоголдук интоксикация» деген диагноз менен келип, саат 04:00 дө ооруканадан чыгып кетүүнү чечкен. Бирок оорукананын кызматкерлери аны туугандары келмейинче коё бербестигин айтышкан. И. Ж. аттуу жаран өзүн агрессивдүү мамиле көрсөтүп, врач-реаниматологго кол көтөрүп, андан соң ооруканадан чыгып кеткен.

Кылмыш иши боюнча бардык зарыл болгон соттук-укуктук экспертизалар дайындалган.

Учурда И.Ж. аттуу жаран Чүй облустук ички иштер бөлүмүнө жеткирилип, тиешелүү тергөө иштери уланууда.

Буга чейин да медицина кызматкерлерине кол көтөрүп, уруп-сабаган учурлар бир нече жолу катталаган.

Жогорку Кеңеште депутаттар өзүнүн кесиптик милдеттерин аткарып жаткан учурда медициналык же фармацевттик кызматкерлерди коркутуп, аларга карата зомбулук жасагандарга кылмыш-жаза жоопкерчилигин киргизүү боюнча мыйзам долбоорун сунушташкан.