Ноокатта 23 млн сомдон ашуун каржылык бузуулар аныкталды

Ноокат районунун бюджетине жүргүзүлгөн аудиттин жыйынтыгында 23 млн 30 миң 400 сомдук каржылык бузуулар аныкталды. Бул тууралуу Эсептөө палатасы кабарлады.

Палата кызматкерлери 2022-жылы жергиликтүү өз алдынча башкаруу органдарынын бюджетин текшеришкен. Анын негизинде төмөнкүлөр аныкталган:

• бюджет долбоорунун мыйзам талаптарына дал келбеши (киреше булагын туура эмес пландоо) – 954,5 миң сом;
• бюджетке төлөмдөрдү эсептөөнүн тууралыгы, толуктугу, өз учурунда төлөнүшү, ошондой эле туумдарды жана айып пулдарды эсептөө, төлөө боюнча көзөмөлдөө чараларынын көрүлбөшү (бюджетке жана Социалдык фондго кошумча эсептөөлөр) – 1273,8 миң сом;
• бюджетке милдеттүү төлөмдөрдү чегербөө же толук эмес чегерүү (салыкка, Социалдык фондго кошумча эсептөөлөр) – 86,4 миң сом;
• максатсыз чыгымдар – 30,5 миң сом;
• казынага түшпөй пайдаланылган каражаттар –185,5 миң сом;
• курулуш иштеринин көлөмүн жана баасын негизсиз жогорулатуу – 2191,5 миң сом;
• эмгек акынын ченемден ашыкча төлөнүшү – 1054,8 миң сом;
• товардык-материалдык баалуулуктардын ченемден ашыкча чыгымдалышы –551,8 миң сом;
• товардык-материалдык баалуулуктардын, акча каражаттарынын ченемден ашыкча корлору – 270,5 миң сом;
• отчёт берүүчү кызматкерлердин иштен бошогондон кийинки отчеттуулукка берилген акча каражаттарынын кайтарылбашы – 100,0 миң сом;
• негизги каражаттарды кириштөө тартибин бузуу, белгиленген тартипте бухгалтердик эсепке алынбай калган, кириштелбеген мамлекеттик (муниципалдык) мүлктөрдүн болушу – 11287,0 миң сом;
• мамлекеттик (муниципалдык) мүлктүн жана мамлекеттик акча каражатынын кем чыгышы (бузулушу, жоголушу, уурдалышы) – 2023,5 миң сом,;
• тастыктоочу документтери жок туруп, мүлктү жана товардык-материалдык баалуулуктарды эсептен чыгаруу жана мамлекеттик (муниципалдык) мүлктү мыйзамга ылайыксыз эсептен чыгаруу – 100,7 миң сом;
• ижара келишимин бузуу – 45,0 миң сом;
• эмгек акы, иш сапар чыгымына жана башка чыгымдарга төлөөдөгү бузуулар, ашыкча төлөөлөр – 439,3 миң сом;
• дебитордук карызды бухгалтердик эсепке алуудагы бузуулар – 2435,8 миң сом.