Бишкек мэриясы «Ош» базардын жаңы долбоорун жарыялады

Бишкек шаарынын мэриясы Батыш автовокзал менен «Ош» базардын жаңы эскиз-долбоорун жарыялады.

Маалым болгондой, орду которула турган эки объектинин жаңы концепциясын «Бишкек башкы архитектуранын» адистери иштеп чыгышкан. Объектилер Фучик-Васильевский тракт көчөлөрүнүн кесилишиндеги айлампа жолго түшөт.

Долбоорго ылайык, аймак беш тилкеге бөлүнөт:

• шаар зонасы;
• кайра жайгаштырылуучу «Ош» базары;
• Volvo электр унаасын тейлөө аймагы;
• Автобустарды тейлөө аймагы;
• Батыш автобекетинин аймагы.

Биринчи аймакка заманбап шарттары менен беш кабаттуу турак үйлөр, соода борборлор, ар кандай бизнес борборлор, 2 мектеп, 3 бала бакча, 1 оорукана түшөт.

Экинчи аймакка унаа токтотуучу жайлары камтылган чыгыш стилиндеги базар түшөт. Жолу кеңейтилип, жүк ташуучу жана жеңил унаалардын кирип-чыгуусуна шарттар каралат.

Үчүнчү аймакка Volvo электромибилдерди тейлөө борбору жайгашат.

Төртүнчү аймакка жүргүнчү тейлөөчү автобекет автопаркы менен кошо түшөт.

Бешинчи аймакка автобекеттин административдик имараты түшөт.