КМШга мүчө мамлекет башчылары 16 документке кол коюшту

Бүгүн, 13-октябрда, Бишкек шаарында Кыргызстандын Президенти Садыр Жапаровдун төрагалыгы астында КМШга мүчө мамлекеттердин Президенттеринин жыйыны өттү.

Иш-чаранын жыйынтыгы менен бир катар документтерге кол коюлду:

КМШ алкагында өз ара кызматташуу жөнүндө пикир алмашуу;
КМШга 2024-жылы төрагалык кылуу жөнүндө;
КМШ Мамлекет башчыларынын Кеңешинин кезектеги жыйынын өткөрүү;
КМШнын Ардак белгиси ордени менен сыйлоо;
Орус тили боюнча Эл аралык уюм түзүү келишими;
Санариптик технологиялар чөйрөсүнө мамлекеттик башкаруу системаларын шайкеш келтирүү үчүн кызматташууга болгон КМШга мүчө мамлекет башчыларынын билдирүүсү;
Көп полярдуу дүйнөдө мамлекеттер аралык мамилелердин принциптери боюнча КМШга мүчө мамлекет башчыларынын билдирүүсү;
Адамдын жана жарандын дин тутуу эркиндигине болгон укуктарын коргоо боюнча КМШга мүчө мамлекет башчыларынын билдирүүсү;
Орус тилин улуттар аралык баарлашуу тили катары колдоо жана өнүктүрүү боюнча КМШга мүчө мамлекет башчыларынын билдирүүсү;
КМШда Байкоочу статусу жана КМШнын Өнөктөш статусу жөнүндө;
Кылмыштуу кирешелерди адалдоо жана терроризмди каржылоо тобокелдиктерин баалаган Эл аралык борбор түзүү боюнча макулдашуу;
КМШга мүчө мамлекеттердин соттук-эксперттик иш чөйрөсүндө Координациялык кеңеш түзүү жөнүндө макулдашуу;
2024-2028-жылдарга кылмыш менен күрөшүү жаатында биргелешкен чаралардын Мамлекеттер аралык программасы жөнүндө;
«Тынчтыкты чыңдоого кошкон салымы үчүн» медалы жөнүндө;
Самарканд шаарын (Өзбекстан Республикасы) «Шериктештиктин 2024-жылдагы маданий борбору» деп жарыялоо жөнүндө;
КМШнын ченемдик-укуктук актыларына өзгөртүүлөрдү киргизүү жөнүндө:

16.1. 2000-жылдын 21-июнундагы Протокол менен бекитилген КМШнын Аткаруу комитети жөнүндө жобого өзгөртүүлөрдү киргизүү;

16.2. КМШ органдарынын чечимдерине өзгөртүүлөрдү киргизүү;

16.3. КМШ Мамлекет башчылар кеңешинин 2003-жылдын 19-сентябрындагы «Шериктештик органдарынын бирдиктүү бюджетине үлүштүк төгүмдөрдү которуу жөнүндө» милдеттенмелердин аткарылышы боюнча чечимине өзгөртүүлөрдү киргизүү.

Айта кетсек, бүгүн, 13-октябрда Бишкек шаарында Кыргызстандын төрагалыгы астында КМШга мүчө мамлекет башчыларынын кезектеги саммити өттү. Ага Азербайжан, Беларусь, Казакстан, Орусия, Өзбекстан, Тажикстан, Түркмөнстан мамлекеттеринин башчылары катышты.