Догдуркүл Кендирбаева билим берүү министри болуп дайындалды

Догдуркүл Кендирбаева Билим берүү жана илим министри болуп дайындалды. Тиешелүү жарлыкка мамлекет башчысы Садыр Жапаров кол койгонун Президенттин администрациясынын маалыматтык саясат бөлүмү билдирди.

Догдуркүл Кендирбаеваны Президент 28-сентябрда билим берүү жана илим министринин милдетин аткаруучу кылып дайындап, министр кызматына бекитүүгө макулдук алуу үчүн Жогорку Кеңешке жөнөткөн. Парламент 5-октябрда өткөн жалпы жыйынында талапкерди дайындоо сунушун колдоп беришкен.

Бул кызматты ага чейин аркалап келген Каныбек Иманалиевди 7-сентябрда Президент «тапшырылган эмгек милдеттерин татыктуу аткарган жок» деген жүйө менен ишинен бошотуп, ордуна орун басары Уланбек Усековду убактылуу милдетин аткаруучу кылып бекиткен.

Кендирбаева Догдуркүл Шаршеевна 1965-жылы 25-июлда Жети-Өгүз районундагы Оргочор айылында туулган. 1991-жылы Кыргыз мамлекеттик университетин «тарых жана коомдук илимдер мугалими» адистигинде аяктаган.

Алгачкы эмгек жолун 1982-жылы «Оргочор» совхозунда иштөөдөн баштаган. 1987-1997-жылдары Оргочор айылынын Ю. А. Гагарин орто мектебинде тарых, экономика сабактарынан мугалим болуп иштеген.

1997-2001-жылдары Мугалимдердин квалификациясын жогорулатуу институтунда облустук мектептерди башкаруу жана инвестиция тартуу лабораториясында жетекчи, 2001-2022-жылдары Азия өнүктүрүү банкынын «Коомдук алкакта балдарды жаштайынан жетилтүү» долбоору боюнча аймактык билим берүү жаатында облустук консультант, 2002-2003-жылдары Мугалимдердин квалификациясын жогорулатуу боюнча облустук институтта лаборатория башчысы, методист, 2003-2004-жылдары Жети-Өгүз районунда акимдин биринчи орун басары, 2004-2007-жылдары Ысык-Көл облустук билим берүү башкармалыгында жетекчи, 2007-2012-жылдары Ысык-Көл облустук Билим берүү институтунда облустук билим берүү уюмдарынын директору, координатору, 2012-2014-жылдары билим берүү жана илим министринин орун басары кызматтарын аркалаган. 2014-жылдын сентябрь айынан бери «Роза Отунбаеванын демилгеси» эл аралык коомдук фондунда аткаруучу директор болуп иштеп жаткан.