Түркия Анкарадагы жардыруудан кийин күрт козголоңчуларына абадан сокку урду

Түркия Ирактын түндүгүндөгү күрт козголоңчуларына абадан сокку урду. BBC орус кызматы түрк бийлигинин маалыматына таянып жазгандай, «Күртстан жумушчу партиясынын» 20 объектисине сокку урулган.

Министрликтин билдирүүсүндө, сокку «Күртстан жумушчу партиясын» жана башка террордук элементтерди таасирсиз кылуу, Ирактын түндүгүнөн түрк калкына жана укук коргоо органдарына каршы террордук чабуулдардын алдын алуу, чек ара коопсуздугун камсыздоо максатында жасалган.

Rudaw күрт кабар агенттиги сокку Ирактын түндүгүндөгү, Иран менен чек арага жакын Кандил тоо кыркаларына урулганын кабарлады. Кандил тоолору барууга мүмкүн болбогон аймак болгондуктан «Күртстан жумушчу партиясынын»  базаларынын бири болуп саналат.

1-октябрда Түркиянын баш калаасында парламенттин жана Ички иштер министрлигинин имаратынын жанында эки белгисиз адам жардыруу кылган.

«Күртстандын жумушчу партиясы» өз сайтында жардырууну 2016-жылдагы Стамбулдагы кол салуулар үчүн жоопкерчиликти өзүнө алган «Өлбөс батальон» деген уюмга караштуу топ жасаганын билдирди.

Кол салгандардын бири күзөтчүлөрдү алаксытуу үчүн унаасынан түшүп, министрликтин имаратына аз кубаттуу жардыруучу зат ыргыткан. Экинчи адам министрликтин дарбазасындагы күзөтчүлөргө ок чыгарып, андан соң бомба жардырып, өзүн өлтүргөн.

Ошол эле учурда биринчи кол салган киши министрликтин имаратына кирип, дароо полиция тарабынан атып өлтүрүлгөн. Эки офицер жараат алган.

Түркиянын ички иштер министри Али Ерликая X социалдык тармагына (мурдагы Twitter) «атышуу учурунда биздин эки полиция кызматкери жеңил жараат алды», — деп жазды.

Жардыруу түрк парламентинин жайкы каникулдан кийин ачыла турган сессиясына бир нече саат калганда болгон.

ИИМ «Рейтер» агенттигине Түркиянын борборунан 260 чакырым түштүк-чыгышта жайгашкан Кайсери шаарында кол салгандар айдоочуну өлтүрүп, унаасын уурдап кетишкенин билдирди. Анын айтымында, жарадар болгон милиция кызматкерлеринин бири жараат алган.

Түркиянын президенти Режеп Тайип Эрдоган парламенттин тыныгуудан кийинки биринчи жыйынында сөз сүйлөп, бул жардырууну «терроризмдин акыркы толкуну» деп атады.

BBCнин маалыматы боюнча, жакында түрк парламенти Швециянын НАТОго кирүүсүн ратификациялайт деп күтүлүүдө. Буга чейин Анкара Швеция күрт согушкерлерине башпаанек берип жатат деген шылтоо менен ага бөгөт койгон.

«Күртстан жумушчу партиясы» (ПКК) Түркиянын аймактарында бир нече жолу кол салууларды жасаган. Ал Түркиянын өзүндө, ошондой эле АКШ жана Евробиримдикте террордук уюм катары таанылган, бирок айрым саясатчылар уюм акыркы кездери күч колдонуу ыкмаларынан баш тартты деп айтышууда.

Түрк бийликтери күрт улутчулдарын катуу кысымга алуу саясатын жүргүзүп, Түркиянын ичиндеги күрт базаларына, ошондой эле Сирия менен Ирактын аймактарына каршы бир нече жолу аскердик операцияларды жүргүзгөн.

АКШнын Түркиядагы элчилиги өзүнүн X тармагындагы баракчасында (мурдагы Twitter) кол салууну катуу айыптады:

«Биз бүгүн эртең менен НАТО боюнча өнөктөшүбүз Түркияга жасалган террордук кол салууну катуу айыптайбыз. Каза болгондорго көңүл айтып, тезирээк сакайып кетишин каалайбыз. Террор менен күрөшүүдө Түркия менен тилектешпиз», — деп жазылды билдирүүдө.

Мындан тышкары Пакистан, Сауд Арабия жана ЕБ да кол салууну айыптап, Түркияга колдоо көрсөтүштү.