«Бүтүн Кыргызстан» партиясынын тарапташтары президентке кайрылышты

«Бүтүн Кыргызстан» саясий партиясынын тарапташтары президент Садыр Жапаровго ачык кат жолдошконун «Фейсбук» баракчасына жарыялашты.

Кайрылууда саясий куугунтукту токтотууга чакырык жасалып, негизги беш талап коюлган:

1. Жогорку Кеңештин «Бүтүн Кыргызстан» парламенттик фракциясынын лидери А.К.Мадумаров мыйзамсыз камалганына байланыштуу камактан токтоосуз бошотулсун;

2.Биздин тарапташтарыбыздын баарына жана журналисттер менен активисттерге каршы негизсиз камоолор, козголгон кылмыш иштери толук токтотулсун;

3. Жарандардын маалымат алуу жана репрессиялардан коркпостон өз пикирин билдирүү мүмкүнчүлүгүн берүү аркылуу ЖМК эркиндиги камсыз кылынсын;

4. Улуттук телерадиоберүү компаниясынын (УТРК), ЭлТР телерадио компаниясынын, облустук телерадио компаниялардын жана башка телеканалдардын айрым жарандарды жана саясий лидерлерди системалуу түрдө каралоосу тез арада токтотулсун ;

5. Адам укуктарынын бузулушу, анын ичинде куугунтук жана саясий репрессиялар боюнча көз карандысыз иликтөө жүргүзүлүп, күнөөлүүлөр адилет сот жообуна тартылсын.