Москвага кайрадан дрон менен чабуул жасалды (видео)

Бүгүн, 30-июлда эртең менен Москвада үч учкучсуз аппараттын жардамы менен чабуул уюштурууга аракет жасалды. Бул тууралуу Орусиянын Коргоо министрлиги кабарлады.

«30-июль күнү эртең менен Киев режиминин Москвадагы объектилерге дрондор менен чабуул жасоо аракетине бөгөт коюлду», — деп айтылат маалыматта.

Учкучсуз аппараттын бирөө Москвадагы Одинцов районунда абадан коргонуучу системанын жардамы менен талкаланган. Дагы экөө радиоэлектрондук каражаттар менен иштен чыгарылган. Натыйжада алар башкарууну жоготуп «Москва-Сити» комплексинин аймагына кулаган.

Москванын мэри Сергей Собянин чабуулдун натыйжасында комплекстин эки кеңсе мунарасынын фасады бир аз жабыркаганын билдирди. Тестов көчөсүндөгү кыймыл токтотулган.

Украина Москванын аймагына тез-тезден чабуул жасоого аракет кылып келет. Июлдун башында эле Москвада беш украиналык дрон жок кылынган. Ал эми бул жуманын башында орусиялык радиоэлектрондук каражаттар эки дронду жок кылган.