Чолпон-Атада скутер үч жаранды сүзүп, экөө каза болду

Иллюстрациялык сүрөт

Чолпон-Атада скутер сүзүп кеткен үч жарандын экөө каза болду. Бул маалыматты Саламаттыкты сактоо министрлиги тастыктады.

Маалыматка караганда, 23-июлда саат 16:30 чамасында Чолпон-Ата шаарында эс алуучу жайлардын биринде суу оюн-зоок кызматын көрсөткөн моторлуу кайыктын айдоочусу көлдүн үстүндө балон сүйрөтүп бара жатып, теплоходго урунган. Натыйжада үч адам денесинен жараат алып, оор абалда Чолпон-Ата шаарынын райондук ооруканасына жеткирилген.

Жабыркаган үч адамдын экөөсү оорукананын жандандыруу бөлүмүндө көз жумуп, үчүнчү жабырлануучу хирургия бөлүмүнө жаткырылган.

Ысык-Көл РИИБнин кызматкерлери тарабынан кылмышка шектүү кармалып, алдын ала суракта шектүү өз күнөөсүн мойнуна алган.

Учурда тийиштүү соттук медициналык экспертизалар дайындалып, тергөөгө чейинки текшерүү иштери улантылууда.