Украина Орусиянын согуш башталгандан берки чыгымын жарыялады

Күнүнө 700 баскынчыны жок кылуудабыз. Бул маалыматты Ukraine NOW Телеграм-каналы жарыялап, аны Украина президенти Владимир Зеленский өз баракчасына бөлүштү.

Алар Орусия тарап согуш башталгандан ушул күнгө чейин канча коротууга учураганын төмөнкүдөй тизмектеген:

• 106 миң 720 жоокер;
• 3 миң 31 танк;
• 6 миң 84 брондолгон аскердик унаа;
• 2 миң 21 артиллериялык оор курал-жарак;
• 423 жапырт атылуучу реактивдүү курал (РСЗО);
• 213 аба чабуулунан коргонуу куралы (ПВО);
• 283 учак;
• 269 тик учак;
• 1792 учкучсуз учуучу аппарат;
• 723 канаттуу ракета;
• 16 кеме;
• 4720 автоунаа жана күйүүчү май ташыган унаа;
• 181 атайын техника.

Айта кетсек, 2022-жылдын 31-декабрында Орусия армиясы Украинанын борбору Киев шаарына чабуулга өткөнүн бир катар басылмалар жазган. Маалыматты шаар мэри Виталий Кличко да тастыктап, үч райондо имараттар кыйрап калганын билдирген.

Орусия армиясы 2022-жылдын 24-февралында Украинага кол салган. Башка мамлекеттер тарабынан бир нече жолу элдештирүү аракеттери жасалганынан майнап чыкпай, согуш учурда да токтобой келет.