Бишкекте беш балдар дарыгери камакка алынды

Бишкек шаарынын Ленин райондук соту беш балдар дарыгерин убактылуу кармоочу жайга киргизүү чечимин чыгарды. Бул тууралуу коомчулукка медицина кызматкерлеринин көз карандысыз кесиптик кошуунунун жетекчиси Бермет Барыктабасова маалымдады.

Кылмыш-жаза кодексинин 146-беренеси (медициналык же фармацевттик кызматкер тарабынан кесиптик милдеттерди талаптагыдай эмес аткаруу) менен кармалган Бишкек шаардык балдар клиникалык тез жардам ооруканасынын жана Эне менен баланы коргоо улуттук борборунун дарыгерлерин сот 10-январга чейин тергөө абагында кармоо чечимин кабыл алган.

Аталган маселе боюнча Бермет Барыктабасова өлкө башчысына кайрылуу жасады.

«Беш дарыгер тиешелүү чаралар бузулган түрдө, киши өлтүргүч катары камакка алынды. Бул — Кыргызстандын тарыхында биринчи жолу күнөөсү далилденбей туруп жасалып жаткан иш. Көз жумган баланын жакындары жогорку кызматтагы адамдар болгондуктан дарыгерлерди «түрмөдө чиритебиз», «дипломуңарды тартып алабыз» деп коркутушкан. Болгон окуя объективдүү териштирилбей, күйүт басуу аракети гана болуп жаткан сыяктуу», — деп жазылган кайрылууда.

Ал ошондой эле камакка алынган дарыгерлер балдардын өмүрүн сактоо тармагында көп жыл иштеген тажрыйбалуу адистер экенин белгилеп, медицина кызматкерлерине кысым жасабоо өтүнүчүн айткан.