Батир, электромобиль, iPhone 13. Чектер лотереясынын байгеси көбөйтүлдү

Салык кызматынын «Чек талап кылып, байге утуп ал!» лотереясынын байге фонду көбөйтүлдү.

Мамлекеттик салык кызматы билдиргендей, байге фондунда мурун 32 белек болсо, азыр 52 белек коюлду.

30-декабрда боло турган 3-утушта 12 даана iPhone 13, 11 Samsung смартфону, 5 кир жуугуч машина, 5 муздаткыч, 5 телевизор, 5 чаң соргуч, 6 микротолкундуу меш ойнотулат.

Баш байге – Бишкектен батир. Ошондой эле бир унаанын ордуна эки электромобиль ойнотулат.

Лотереянын үчүнчү оюну 30-декабрда КТРК, «Ала-Тоо 24» телеканалдарында жана Салык кызматынын Facebook, YouTube баракчаларында түз эфирде көрсөтүлөт.

Бүгүнкү күндө лотереяга 170 миңден ашык адам катышып, алар жалпы суммасы 18,3 млрд сомго 17,9 млн лотереялык ID-билеттерди топтошкон.

Лотереянын катышуучусу болуу үчүн «Салык чек» мобилдик тиркемесин жүктөп алуу, каттоо жол-жобосунан өтүү жана кассалык чектердин QR-кодун сканерлөө зарыл.

Салык кызматы жарандарга товарларды же кызматтарды сатып алууда кассалык чекти талап кылууну сунуштайт, анткени алардын ар бири катышуучунун жеңишке жетүү мүмкүнчүлүгүн жогорулатат.