Чек ара: Тажик тарап танк, бронетранспортер, миномет колдонууда (видео)

Мамлекеттик чек аранын кыргыз-тажик тилкесинде кырдаал курч бойдон калууда.

Улуттук коопсуздук боюнча мамлекеттик комитеттин чек ара кызматы Баткен облусунда кыргыз-тажик чек арасынын бардык чектешкен аймактары боюнча атышуу уланып жатканын белгилейт.

Маалыматка караганда, тажик тарап танктарды, бронетранспортерлорду, жөө аскерлердин согуштук машиналарын жана минометторду колдонууда.

Бүгүн, 16-сентябрь күнү Кыргызстан менен Тажикстандын чек арасындагы бир нече участокто атышуу башталган. УКМКнын Чек ара кызматынын маалыматына караганда, саат 06:00 чамасында тажик тарап Эки-Таш, Чир-Дөбө, Кум-Мазар жана Орто аймактардагы чек ара отряддарын жана кыргыз тараптын позицияларын аткылоого киришти.

Саат 6:30да тажик тарап Баткен чек ара отрядынын Көк-Таш чек ара заставасынын жооптуу бөлүгүн миномёттон аткылоого киришти.

Саат 7:15те тажик аскер кызматкерлери Самаркандек чек ара заставасын аткылай башташты. Кыргызстандын төрт чек арачысы жараат алды.