Дүйнөлүк рейтингде Бишкек «жашоосу эң арзан шаар» деп табылды

Бишкек, Ташкент, Дүйшөмбү шаарлары «чет элдиктердин жашашы үчүн эң арзан шаар» деп табылды. Бул маалымат Cost of Living City рейтингинде жарыяланды.

Сурамжылоо 227 шаарга жүргүзүлгөн. Анын натыйжасында Гонконг «эң кымбат шаар» (1-орун), ал эми Анкара «эң арзан шаар» (227-орун) деп эсептелген.

«Кымбат шаарлар» ондугунда Гонконгдон кийинки төрт орунду катары менен Швейцариянын Цюрих, Женева, Базель, Берн шаарлары алса, 6-орундан 10-орунга чейин Тель-Авив, Нью-Йорк, Сингапур, Токио, Бээжин шаарлары жайгашкан.

Ал эми Бишкек 226-орунду, Ташкент 221-орунду, Дүйшөмбү 225-орунду ээлеген. «Эң арзан шаарлардын» ондугунда ошондой эле Алжир (218), Алматы (219), Тунис (220), Стамбул (222), Карачи (223), Исламабад (224) шаарлары да бар.

Шаарлардын рейтинги тамак-аш, азык-түлүк баалары, батир же мейманкана акы, жол кире, оюн-зоок же маданий-эс алуу жайларына кирүү акысы сыяктуу соода, тейлөө тармактарындагы 200гө чукул көрсөткүчтүн негизинде жыл сайын чыгарылат.