Бишкекте КМШ өлкөлөрүнүн жаш киноишмерлеринин «Үмүт» форуму өтөт

Бишкек шаарында 19-июндан 23-июнга чейин КМШ өлкөлөрүнүн жаш киноишмерлеринин «Үмүт» X мааракелик форуму өтөт. Бул тууралуу Кинематография департаменти кабарлады.

Бул жолку мааракелик форум КР эл артисти, кинорежиссёр Геннадий Базаровдун 80 жылдыгына жана экология темасына арналат. Ага Кыргызстан, Казакстан, Өзбекстан, Тажикстан, Орусия, Азербайжан, Армения, Индия, Кытайдан жаш киноишмерлер келет.

Иш-чаранын алкагында улуттук жана эл аралык кино сынак өткөрүлүп, жеңүүчүлөрдүн жана катышуучулардын тасмалары көрсөтүлөт. Айта кетсек, быйылкы сынакка 2022-жылдын ичинде тартылган 16 тасма ат салышары буга чейин кабарланган.

Андан тышкары тажрыйбалуу киноишмерлердин чеберчилик сабактары, тематикалык конференция, талкуу, жаңы долбоорлордун таанытымдары орун алат.

Айта кетсек, КМШ өлкөлөрүнүн жаш киноишмерлеринин эл аралык форуму алгач 2013-жылы КМШ мамлекеттер аралык гуманитардык кызматташтык фондунун, КР Маданият министрлигинин колдоосу менен Кыргызстандын Кинематография департаменти тарабынан уюштурулган.