УКМК Тажикстандын Түркиядан «Байрактарды» сатып алганын төгүндөдү

Кыргызстандын Улуттук коопсуздук мамлекеттик комитети Тажикстандын  Түркиядан «Байрактар» учкучсуз учуучу учактарын сатып алганы тууралуу маалыматтарды төгүндөдү.

«Жалпыга маалымдоо каражаттарында чыккан маалыматтын алкагында, алынган ишенимдүү маалыматтарга караганда, тажик тарап «Байрактар» учкучсуз учуучу учактарды чыгаруучу «Байкар Макина» компаниясы менен, ошондой эле башка түркиялык ушуга окшогон өндүрүүчүлөр менен учкучсуз учуучу учактарды сатып алуу боюнча келишим түзбөгөнүн маалымдайбыз», — деп билдирди УКМКнын басма сөз кызматы.

Атайын кызмат Кыргызстан Борбор Азия чөлкөмүндө туруктуулукту жана коопсуздукту сактоо үчүн тынчтык жана коңшулук саясатын жүргүзөрүн билдирет. Кыргызстан коңшу мамлекеттерге карата агрессивдүү саясатты эч качан карманган эмес жана карманбайт.

Ал эми буга чейин сатып алынган түрк учкучсуз учуучу учактары Ооганстандагы кырдаалга, Борбор Азия мамлекеттерине террордук жана диний-экстремисттик коркунучтун жогору болуп жаткандыгына байланыштуу коргонуу максатында гана алынганын эскеретти.

Буга чейин интернетте Түркия «Байрактар TБ2» дрондорун Тажикстанга сатканы боюнча маалыматтар тараган. Кыргызстандын тышкы иштер министрини милдетин аткаруучу Жээнбек Кулубаев Жогорку Кеңештин жыйынында депутаттын суроосуна жооп берип жатып, муну тастыктаган эле.