Өкмөт антикризистик иш-чаралар планына 126 млрд сом бөлөт

Министрлер кабинетинин төрагасы Акылбек Жапаров социалдык-экономикалык чакырыктарга ыкчам чара көрүү боюнча Антикризистик комитеттин жыйынын өткөрүп, анда 2022-жылга чаралар планы кабыл алынды.

Ал дүйнөлүк экономикалык системадагы өзгөрүүлөрдөн улам калкка жана бизнеске мамлекеттик колдоо көрсөтүүгө багытталган.

Планга киргизилген чаралар 7 багытка топтолгон:

1. Азык-түлүк коопсуздугун камсыз кылуу жана артыкчылыктуу товарлардын баасын турукташтыруу;

2. Социалдык колдоо жана иш менен камсыз кылуу;

3. Каржылык туруктуулукка шарт түзүү;

4. Ишкерлерге колдоо көрсөтүү;

5. Инвестиция тартуу;

6. Товар жүгүртүүнү жогорулатуу;

7. Мамлекеттик бюджеттин туруктуулугун камсыз кылуу.

Бул планды ишке ашыруу үчүн зарыл болгон каржынын көлөмү болжол менен 126 млрд сомду түзөт.

Планда дыйкан-фермерлерге жеңилдетилген насыяларды берүү, айдоо-себүү иштерин жүргүзүүдө дыйкандарды үрөн, жер семирткич, күйүүчү-майлоочу май менен камсыздоого көмөк көрсөтүү, ирригациялык курулуштарды оңдоого жана калыбына келтирүүгө каражат бөлүү каралган.