Өзбекстанда Шавхат Мирзиёевдин жеңиши расмий жарыяланды

Өзбекстан Борбордук шайлоо комиссиясы президенттик шайлоонун расмий жыйынтыгын жарыялады.

Андан белгилүү болгондой, 20 миллион 158 миң 907 шайлоочунун 16 миллион 212 миң 343ү, тактап айтканда, 80,4%ы президенттик шайлоого добуш берген.

Бардык бюллетендер толук саналып бүткөнүн айткан борбордук шайлоо комиссиясынын төрагасы Зайниддин Низамходжаев расмий жыйынтык төмөнкүчө болгонун маалымдады:

«Адилет» социал-демократиялык партиясынын талапкери Бахром Абдухалимов — 3,4%;

Экологиялык партиянын талапкери Нарзулло Оболмурадов — 4,1%;

«Улуттук кайра жаралуу» демократиялык партиясынын талапкери Алишер Кодиров — 5,5%;

Элдик демократия партиясынын талапкери — Максуда Варисова — 6,6%;

Либерал-демократтар партиясынын талапкери — Шавкат Мирзиёев — 80,1%.

«Өзбекстан Республикасынын Шайлоо кодексине ылайык, катышкан шайлоочулардын 50 пайыздан көбүнүн добушун алган талапкер президенттикке шайланды деп эсептелет. Мындан улам, бизнесмендер жана ишкерлер кыймылы — Өзбекстан Либерал-демократтар партиясынан талапкер Шавкат Миромонович Мирзиёев шайлоочулардын эң көп — 80,1%ынын добушун алып, жеңишке жеткенин жана Өзбекстан Республикасынын Президенти болуп шайланганын расмий жарыялайбыз», — деди төрага.

Айта кетсек, Өзбекстанда президенттик шайлоо кечээ, 24-октябрда өткөн.