Темирлан Султанбековго кол салуу боюнча иш козголду

«Социал-демократтар» партиясынын лидери Темирлан Султанбековго кол салуу боюнча «ээнбаштык» беренеси менен иш ачылды. Бул тууралуу Чүй облустук милициясынан билдиришти.

Аталган ишти иликтөө үчүн тажрыйбалуу кызматкерлерден турган ыкчам-тергөө тобу түзүлгөн.

Мындан мурдараак Темирлан Султанбеков социалдык тармактарга 26-август күнү болжол менен саат 01:30да анын унаасына белгисиз бирөө (божомол боюнча) травматикалык тапанчадан ок атканы тууралуу жазган.

Милициядан белгилешкендей, аталган окуя боюнча Султанбеков Аламүдүн райондук милициясына 26-августта саат 18:30дарда кайрылып, белгисиз адамдарга карата чара көрүүнү суранган.

Аталган факт боюнча Жазык кодексинин 266-беренеси («Ээнбаштык») менен иш козголгон.

Султанбековдун айтымы боюнча, 26-август түнү ал айдоочусу менен Кой-Таштагы көчөлөрдүн биринде түштүк тарапты көздөй баратып, уктап кеткен. Андан кийин катуу үндөн ойгонгон – үн ал отурган арткы оң капталдагы айнек жактан чыккан. Алар унааны токтотпостон, катуу ылдамдык менен жүрүп кетишкен. Кийин токтогондон кийин каптал айнек сынганын көрүшкөн.

Султанбеков менен айдоочусы жаракат албагандыктан соттук-медициналык текшерүүдөн өтүүдөн баш тарткан.

Учурда тиешелүү экспертизалар белгиленген.

Белгилей кетсек, Темирлан Султанбеков аталган окуяны өзүнүн өмүрүнө кол салуу эмес, коркутуу же эскертүү берүү үчүн жасалган деп эсептейт.