Жогорку Кеңеш шайлоо босогосун төмөндөтүү мыйзамын колдоду

Жогорку Кеңештин депутаттары «КР президентин жана Жогорку Кеңештин депутаттарын шайлоо жөнүндө конституциялык мыйзамына өзгөртүүлөрдүү киргизүү тууралуу» мыйзам долбоорун экинчи жана үчүнчү окууда жактырды.

Аталган мыйзам долбоордун демилгечилери — Алтынбек Сулайманов, Айсулуу Мамашова, Мирлан Жээнчороев, Жанар Акаев, Абдывахап Нурбаев.

Демилгечилердин айтымында, шайлоо мыйзамына негизги үч өзгөртүү киргизилет. Шайлоо босогосун 7%дан 3%га, шайлоо күрөөсүн 5 млн сомдон 1 млн сомго түшүрүү жана №2 форманы (шайлоо дарегин алмаштыруу) алып салуу сунушталууда.

Ошондой эле азыркы мыйзамдар боюнча шайлоого катышкан партия шайлоочулардын 5%ынын добушун алган учурда шайлоо күрөөсү кайтарылып берилсе, эми алардын мыйзам долбоору боюнча шайлоо күрөөсүн шайлоочулардын 1%ынын добушун алган партияларга кайтарып берүү сунушталууда.

«Жаш партиялар парламентке келүү максатында сунуштаган Мыйзам долбоорубуз 3 окууда кабыл алынды.

— Форма-2 жокко чыгарылды;

— Босого чени 3%га түштү;

— Шайлоо күрөөсү 1 миллион сомго төмөндөтүлдү. Бул алгачкы гана кадамдар», — дейт Сулайманов.