Бишкекте жасалма өткөрмө кагазын жасап, 1500 сомдон саткан жаран кармалды

Бишкек шаарында 1,5 миң сомго жасалма уруксат кагазын саткан 1990-жылы туулган Б.Р. аттуу жаран кармалды. Бул тууралуу бүгүн, 24-апрелдеги онлайн брифингде Бишкек шаарынын коменданты Алмаз Орозалиев билдирди.

Анын айтымында, тергөө учурунда андан жасалма мөөр, уруксат барактар табылган.

«Жасалма өткөрмө кагаздары менен алектенип, аларды 1500 сомдон сатып жүргөн 1990-жылы төрөлгөн жигитти кармадык. Андан мөөр, клише жана өткөрмө кагаздар алынды”, — деп билдирди Бишкек шаарынын коменданты Алмазбек Орозалиев.

Комендант бул учурду аныктоого көмөктөшкөн журналистке ыраазычылык билдирди. Ошондой эле ал аталган факт Кылмыштар жана жоруктардын бирдиктүү реестрине катталып, тиешелүү экспертизалар дайындалганын билдирди.