«Акнет» компаниясы президентке кайрылды

«Акнет» компаниясынын юристи Эрнст Озеров президент Сооронбай Жээнбековго кайрылды. Бул тууралуу ал маалымат жыйында билдирип, аталган ишканага укук коргоо органдары тарабынан кысым болуп жатканын кабарлады.

2018-жылдын 22-ноябрынан бери «Акнетке» кысым болуп жатканын, жалпысынан 9 кылмыш иши ачылганын да айтты.

«5 ай ичинде Финполиция тарабынан кысымга кабылып, 150 млн. сомдук айып коюлуп, төлөөгө мажбур болдук. Бул убакыт ичинде биздин жетекчилик эч кандай мыйзам бузбаганын далилдеди», — деп айтылат маалыматта.

Учурда компанияны рейдерлик жол менен тартып алуу аракеттери болуп жатканын, ага укук коргоо органдары көмөктөшүп жатканын айтып, мамлекет башчыга, Башкы прокуратурага жана Коопсуздук Кеңешине кайрылды.