Улуттук банк доллардын өсүшүнө байланыштуу түшүндүрмө берди

Улуттук банк доллардын курсунун өсүшүнө байланыштуу түшүндүрмө берди. Мекеменин маалыматына караганда, акыркы убакта өлкөнүн ички валюта рыногунда чет өлкө валютасына болгон суроо-талаптын өсүшү байкалган. Бул алмашуу курсундагы өзгөрүүлөргө алып келди.

«Мындай тенденция өлкөнүн экономикасы үчүн мүнөздүү көрүнүш, ал сезон учурунда суроо-талаптын экономикалык жактан активдүү фазасы, жылдын төртүнчү чейрегинде керектөөнүн жана тиешелүү импорттун өсүшүнө байланыштуу», — деп билдирет өлкөнүн башкы банкы.

Улуттук банк чет өлкө валютасынын сомго карата алмашуу курсу ички валюта рыногунда эркин түзүлөрүн жана валютага болгон суроо-талап менен сунуштун негизинде аныкталарын эскертет.

2023-жылдын башынан тарта АКШ долларынын сомго карата расмий курсу 4,25% өстү.

Бүгүн, 19-октябрга карата доллардын сомго карата расмий курсу 89,3200 сомду түздү. Акча алмаштыруучу жайларда жана коммерциялык банктарда 89,37 сом болууда.