Жактоочу Тенгиз Бөлтүрүктүн саламаттыгы начар экенин айтты

«Улуу көчмөндөр мурасы» улуттук холдингинин мурдагы башчысы Тенгиз Бөлтүрүктүн жактоочусу Кайсын Абакиров Бөлтүрүктүн саламаттыгы начар экенин жана аны абакта кармоого болбой турганын айтууда.

Жактоочунун маалыматына караганда, Тенгиз Бөлтүрүккө жүрөк-кан тамыр ооруларынын оор түрү диагнозу коюлган. Аны медициналык корутунду тастыктаган.

«Өкмөттүн 2018-жылдын 20-июнундагы №296 «шектүүлөрдү, айыпталуучуларды камакка алууга тоскоол болгон оор илдеттердин тизмесин бекитүү тууралуу» токтомуна ылайык, III даражадагы жогорку тобокелдиктеги жүрөк-кан тамыр оорулары оор илдеттерге кирет. Ошондуктан анын мындан ары түрмөдө болушун кыйноо катары бааласа болот», — деди жактоочу.

Тенгиз Бөлтүрүктүн жубайы Ильмира Алпысбаева 13-марттан баштап ачкачылык жарыялаганын Фейсбуктагы баракчасына жазды.

Тенгиз Бөлтүрүк президентке кечирим сураган кат жолдоду

Тенгиз Бөлтүрүк «Кумтөрдөгү» коррупциялык схемага байланыштуу кармалган. Башкы прокуратуранын маалыматына караганда, мындан мамлекет 1 млрд сомго жакын зыян тарткан.