Өмүрбек Бабанов Кыргызстанга кайтып келди

Мурдагы өкмөт башчы Өмүрбек Бабанов Москвада операция болгондон кийин Кыргызстанга кайтып келди. Бул тууралуу «Маралга» анын тарапташы Мирсулжан Намазалиев билдирди.

Анын айтымында, Бабанов Кыргызстанга кечээ, 5-сентябрда кайтып келген. Учурда ал үйүндө.

Намазалиев Бабановго кандай операция жасалганын айткан жок.

Эскерте кетсек, Бабанов «Кумтөр» иши боюнча Кылмыш-жаза кодексинин 319-беренесинин 2-бөлүмү («Коррупция») боюнча шектүү катары кармалып, УКМКнын тергөө абагында камакта болуп келген.

Ден соолугу начарлаганына байланыштуу 27-июлда Биринчи май райондук соту Бабановдун баш коргоо чарасын өзгөртүп, чет жерге дарыланууга чыгуусуна уруксат берген. 5-августта Бабанов дарылануу үчүн Москвага чыгып кеткен.