Аялдар шайлоого көп катыша баштады. Бакашова БУУга ыраазычылык билдирди

Министрлер кабинетинин төрагасынын орун басары Жылдыз Бакашова БУУнун Кыргызстандагы туруктуу координатору Озонниа Ожиело менен шайлоо маселесин талкуулады.

Бакашеванын айтымында, 11-апрелде өткөн жергиликтүү кеңештерге шайлоолордун жыйынтыгы боюнча аялдар 38% депутаттык мандатка ээ болгон. Бул — Кыргызстандын БУУ менен жемиштүү кызматташтыктын натыйжасы.

«Парламенттик шайлоолордо да бул жаатта жакшы натыйжалар орун аларына ишеним билдирем», — деди Жылдыз Бакашова.

Кыргызстанда БУУнун көмөгү менен гендердик теңчиликтин 2021-2030-жылдарга улуттук стратегиясы иштелип чыкты.

Мындан тышкары Баткен окуясынан кийин аялдарга жана кыздарга каршы зомбулуктун бардык түрүнө каршы күрөшүүгө багытталган «Луч света» демилгесине Баткен жана Лейлек райондорун кошуу маселеси талкууланды.