Бишкекке Орусиядан медициналык кызматкерлердин экинчи тобу келди

Бишкекке Орусиядан медициналык кызматкерлердин экинчи тобу келди. Өлкөнүн Кыргызстандагы элчилигинин маалыматы боюнча, дарыгер-эпидемиолог, инфекционисттер жана башка адистер Москва жана Уфа шаарларынан келди.

Алар кыргызстандык медиктерге коронавируска каршы күрөшүүдө жардам беришет.

Мындан тышкары, 25-июлда Орусиядан атайын борт менен медициналык жабдык жана дары-дармектердин келери күтүлүүдө.

22-июлда Кыргызстанга Орусиядан аскер медициналык кызматкерлери келген. Өкмөттүн маалыматына караганда, медициналык кызматкерлерди Орусиянын Коргоо министрлигинин атайын учагы «Кант» авиабазасына жеткирген. Атайын учак менен керектүү жабдыктар жана дары-дармектер да алып келинген.

20 кишиден турган медициналык топ кыргызстандык аскер дарыгерлери менен бирге аскер кызматкерлерине, алардын үй-бүлө мүчөлөрүнө жана аскер ардагерлерине кеңеш, практикалык түрдө жардам көрсөтүшөт.

Орусиялык адистер өлкөнүн эки шаарынын госпиталдарында, тагыраак айтканда, төрт топ Бишкекте, эки топ Ош шаарында иштешет.