Президент чек арадагы кырдаалды курчутпоого чакырды

Президент Сооронбай Жээнбеков бүгүн, 17-сентябрда кыргыз-тажик чек арасындагы кырдаал боюнча жыйын өткөрдү. Мамлекет башчы Баткен облусундагы чек ара участогунда чыр-чатак пайда болгондон баштап, толук ыкчам маалымат алып турганын белгиледи.

Өлкө башчыга ок атуучу куралды биринчи болуп тажик тарап колдонгону айтылды. Ал мындан ары чыр-чатакты курчутпай, жергиликтүү калкка түшүндүрүү иштерин жүргүзүү зарылдыгын белгиледи.

Жээнбеков Мамлекеттик чек ара кызматынын атайын даярдыктагы «Бөрү» отрядынын аскер кызматчысы Равшан Муминовдун аскердик милдетин аткарууда курман болгондугуна байланыштуу үй-бүлөсүнө көңүл айтты.

Ошондой эле, кырдаалды жөнгө салуу эл аралык укук алкагында жана Тажикстандын президенти Эмомали Рахмон менен сүйлөшүүлөрдүн жүрүшүндө бир канча жолу белгиленген мурда жетишилген келишимдердин негизинде жүргүзүлүшү керек.